Good-bye, Galicia é o título co que Mario Regueira reúne para Chan da Pólvora a poesía galega e os ensaios de Euxenio Montes, un dos primeiros escritores vangardistas da literatura galega e, tamén, unha das figuras máis controvertidas da historia do século XX, período no que pasou de admirado activista no galeguismo a impulsor da Falange española. A edición de Regueira preséntase o vindeiro mércores 22 de xullo na libraría Couceiro de Compostela a partir das sete da tarde. O volume forma parte dun proxecto de Chan da Pólvora para revisar as vangardas de primeiros do século XX en Galicia.

Continúe lendo Mario Regueira presenta o día 22 ‘Good-bye, Galicia’, a poesía reunida de Euxenio Montes

A Ulloa celebra neste mes de xullo a publicación de Días de bestaxe, o debut na poesía dun dos activistas máis carismáticos das últimas décadas en Galicia, Braulio Vilariño, autor dun poemario que percorre as tres últimas décadas do século XX. Incluído na colección Punta de estripeiral de Chan da Pólvora, Días de bestaxe irrompe no panorama actual cunha proposta onde a palabra se converte en alustro de revelación lisérxica. Unha experiencia de poderosa biografía colectiva que conta coas contornas de Daniel Salgado. “Os poemas de Braulio V.”, escribe Salgado, “encarnan a histoira da última ética beat, a da procura de utopías mínimas: a lisérxica, as illas, deixade en paz o noso río”.

Continúe lendo Braulio Vilariño e as revelacións lisérxicas de ‘Días de bestaxe’, o seu debut na poesía

Pilar Pallarés presenta o vindeiro xoves 16 de xullo na Coruña a súa nova publicación, Unha escriba, onde reúne o conxunto da súa poesía, incluída a dispersa. O acto, que comezará a partrir das oito da tarde en Portas Ártabras, contará coa introdución de Miguel Mato, que se adentrará na espiral envolvente da poesía de Pallarés, unha das voces capitais da literatura galega actual. “A vida só é máis vida / se o pensamento vén e se dá en éxtase”, escribe xa ao final do libro nunha caste de principio de vida que culmina está excepcional panorámica sobre a súa obra.

Continúe lendo Pilar Pallarés presenta ‘Unha escriba’ o día 16 de xullo no Portas Ártabras da Coruña

En 1920, Vicente Risco publica U… ju… juu, un “poema futurista” que introduce a vangarda na literatura galega. Ao seu fío, aparecen outras propostas que afianzan a liña a través de Manuel Antonio ou Euxenio Montes. Un século despois, Chan da Pólvora revisa un excepcional capítulo da nosa literatura e publica en edicións específicas o U… ju.. juu de Risco, con contornas de Carlos L. Bernárdez e Miro Villar; o manifesto Máis alá de Manuel Antonio e Álvaro Cibreiro, o De catro a catro de Manuel Antonio e a poesía en galego de Montes.  

Continúe lendo Chan da Pólvora inicia con ‘U.. ju… juu’ de Risco unha crónica da vangarda galega

Chan da Pólvora e a Libraría Wells de Cangas celebran o seu décimo aniversario cun recital que reunirá a poetas de vínculos á comarca do Morrazo e ao catálogo da editora . O encontro terá lugar o vindeiro xoves nove de xullo ás 20.30 horas e con el dáse continuidade ao programa desenvolvido por Chan da Pólvora cada verán neste espazo de referencia para a cultura libresca galega. No recital participan Ismael Ramos, Xosé María Álvarez Cáccamo, Miriam Ferradáns, Carlos Amado, Oriana Méndez e Braulio Vilariño. Cando as dúas cabeceiras cumpren unha década e Chan da Pólvora culmina a súa acción editorial, este recital festexa unha alianza que converteu o Morrazo nun dos ámbitos principais de acción de Chan da Pólvora, tanto en Cangas como en Bueu, concello onde se localiza precisamente o topónimo que lle dá nome á editora.

---

 

En xullo de 1922, no terceiro número da revista Contemporânea, Fernando Pessoa publica o artigo António Botto e o Ideal Estético em Portugal, que provoca a cólera nos círculos portugueses moralmente máis reaccionarios por tratarse dun autor –Botto– abertamente homosexual e dun referente literario –Pessoa– que enxalzaba “comportamentos desviados”. A partir dese momento, armouse unha campaña que durou varios anos e que culminou coa queima, por orde do gobernador civil de Lisboa, non só dos exemplares das Cançoes de Botto senón tamén da revista na que Raul Leal publicara o artigo Sodoma divinizada e doutro título, a xuízo dos estudantes católicos, escandaloso: Decadência de Judith Teixeira. Chan da Pólvora recupera agora as tres obras nun único volume coordinado por Carlos Quiroga que leva por título Literatura de Sodoma e co que a editora celebra un ano máis este 28 de xuño, a partir das oito da tarde, o Día do Orgullo Galego.

Continúe lendo ‘Literatura de Sodoma’, a crónica da homofobia desde a cortada da moral portuguesa