Publicado o

Tres poetas na colleita excepcional da recente temporada de Chan da Pólvora

Son tres poetas de forte personalidade. Tres mulleres que falan desde distintas posicións pero que teñen en común unha actitude  de combate, sexa desde a política activa, o sindicalismo ou os medios de comunicación. Dúas delas, Nieves Neira Roca e Mercedes Martínez Modroño, publicaron en Chan da Pólvora os seus libros Neve de agosto e A falta dun Eden, a terra, ambos cunha gran acollida por parte da afección. Neses libros, aparecen dous poemas, Despois de Lermos e Tarefas, que acaban de entrar entre os dez finalistas dos Premios Ari[t]mar, galardón promovido desde a Escola Oficial de Idiomas de Santiago ao que se adheriu un amplo abano de centros de ensino e institucións. A par delas, a editorial acada de novo relevancia grazas a Marta Dacosta, que coa súa antoloxía de xénero Así fala Penélope lle proporcionou a candidatura á mellor iniciativa bibliográfica do ano dentro dos premios Follas Novas, organizado polas asociacións gremiais do libro –editores, libreiros e escritores– que se entrega o próximo sábado 22 de abril en Compostela.

Continúe lendo Tres poetas na colleita excepcional da recente temporada de Chan da Pólvora

Publicado o

‘Así fala Penélope’, a antoloxía de xénero que fixo Marta Dacosta para Chan da Pólvora, é finalista do Premio Follas Novas á iniciativa bibliográfica

Os premios Follas Novas, que organizan os gremios de editores, libreiros e a asociación de escritores, xa ten finalistas e entre eles figura Así fala Penélope, a antoloxía de xenero elaborada por Marta Dacosta para a colección Sentulo de Chan da Pólvora Editora. O volume, que vai pola súa segunda edición, aparece incluído no apartado de Iniciativas Bibliográficas.

A proposta de Marta Dacosta é un apaixonado percorrido a través da escrita contemporánea das mulleres galegas. Trátase dun proxecto inédito: unha antoloxía de xénero onde os nomes e as cronoloxías trenzan un realto comunal con poemas que nos descobren como elas, con frecuencia, recoseron as palabras usadas para facelas lucir dun xeito distinto ou como, as máis das veces, optaron polas teas novbas. O resultado é unha selección que visualiza autoras, reivindica a literatura e lle ofrece á rapazada unha esixente panorámica da poesía desde finais do século XX ata hoxe.

Ademais da escolma, no libro inclúese un código QR mediante o que é posible ampliar a nómina de escritoras seleccionadas e atopar unha variada achega de materiais, entre eles  unha unidade didáctica que se converteu nunha ferramenta moi utilizada nos centros de ensino.