Autor: Antón Lopo

“Neste libro hai imaxes, recordos, anhelos e morriña… Pero tamén esquecementos”, asegura Roberto Varela no texto co que nos introduce no seu primeiro libro, O tempo que vivimos, que estes días chega ás librarías nunha coedición de Chan da Pólvora para a Colección Onsa. Roberto Varela, ex conselleiro de Cultura da Xunta e diplomático de profesión, selecciona no libro algunhas das fotografías que realizou ao longo da última década e crea con elas unha sorte de poemas visuais, con pequenos textos onde reflexiona sobre as formas na que a vida nos vai transformando.  Nesta aventura editorial, acompáñano Luísa Castro, Antón Reixa e Ion de la Riva.

Continúe lendo As escintilacións e a vida a través da cámara fotográfica de Roberto Varela

“Desvertebrar, nunha das súas acepcións, significa desfacer a estrutura interna que lle outorga solidez ou estabilidade a algo. Gústame pensar que A desvértebra, ese neoloxismo que Ana Romaní vai pór no foco de atención ao situalo á fronte do seu último libro, camiña por estes eidos, isto é, polos de se cuestionar a esencia do establecido e do inmutable e, talvez por iso, dialogue cos conceptos do quebranto e do disruptivo ao encarnar en si mesmo unha dimensión de renovación radical”. Así arranca a crítica que Ramón Nicolás lle dedica ao último libro de Ana Romaní, publicada no suplemento Fugas de La Voz de Galicia e no seu blog Caderno da crítica, onde tamén inclui informa do proxecto impulsado por Chus Silva e Ana Romaní,no Laboratorio de Indagacións Poéticas (LIPo) de Chan da Pólvora, para realizar distintas audiografías baseadas nos poemas deste libro. No blog inclúe, precisamente, dúas mostras, Imperio e Velutinas.

No libro, engade Ramon Nicolás, “alenta unha semántica que agroma, talvez, da negación da vértebra, isto é, fálasenos en aparencia desde a instancia do que xa non é quen de soster nada, da inmediatez do colapso ou do baleiro que queda cando se extrae e se quere facer desaparecer o que antes era vital”.

Para ler a crítica completa:

A desvértebra, de Ana Romaní

En tempos cunha “inflación retórica das palabras” A desvértebra de Ana Romaní emerxe “cunha enorme afouteza”, asegura Ramón Rozas na súa crítica O xiro é a desvértebra, publicado no suplemento Táboa redonda do Diario de Pontevedra e El Progreso. O título de Romaní, que aparece entre os libros recomendados da Tabela dos libros do blog de Armando Requeixo, sitúanos “ante unha proposta inmersiva na que o literario, o xeográfico e o político xeran un espazo de exploración do eu fronte ao colectivo, do ser ante unha orografía imprevista”. Rozas tamén lle dedica entradas a Ferrovías, de John Berger e Anne Michaels, que acaba de publicar Chan da Pólvora na súa colección O Río de traducións, e nós outras, a proposta de poesía infantil realizada por Marica Campo con imaxes de Menchu Lamas na colección Udra.

 

Para ler a crítica completa: “O xiro é a desvértebra” Ramon Rozas [20210110P034]

Como velutinas e Imperio son os títulos das dúas novas audiografías basadas en  A desvértebra, o último libro de Romaní, publicado por Chan da Pólvora. Desde o pasado mes de decembro, Silva e Romaní velen facundo distintas entregas desta experimentación coas xeografías e a voz que podes ir descubrindo na web da editorial a través do Laboratorio de Indagacións Poéticas (LIPo).

O proxecto consiste en trasladar a voz da poeta ao exterior e integrala nun corpo sonoro. Para a realización de cada peza, gravaron primeiro en estudio os poemas. Logo, reproducíronos por un altofalante en diferentes localizacións e rexistraron de novo o audio mediante unha imaxe. Como resultado, os poemas non só se suman ao espazo, senón que forman parte del: transfórmano e ao tempo transfórmanse.

LIPo

---

 

O libro Tinta de Luz de Pepe Caccamo, que Chan da Pólvora publicou con imaxes de Berta Cáccamo, ingresou na Lista de Honra do Ibby, a organización internacional para o libro xuvenil. Pepe Cáccamo foi o único autor galego seleccionado nun apartado que recolle a só 68 escritores e escritoras do mundo, en 48 linguas diferentes e sesenta países. A inclusión nesta lista supón tamén un recoñecemento á excelencia editorial. A lista do Ibby, que inclúe no apartado de tradución á realizada ao galego por David A. Álvarez Martínez sobre Pippi mediaslongas de Astrid Lindgren, aparece cada dous anos en inglés. O máis importante desta lista é que representa o mellor da literatura de rapazas e rapaces que se publica no mundo e unha recomendación para a súa publicación nos países que pertencen a esta organziación internacional.

Debido á pandemia polo coronavirus, a presentación oficial da lista pospúxose este ano ata setembro de 2021, dentro do congreso que se celebrará en Moscova.

Tinta de luz foi o volume que abriu a colección Udra de poesía para nenas e nenos. Recentemente, chegou ás librarías o número dous desta colección, titulado, nos outras, un libro que pretende afianzar a idea de que non hai desculpas para a marxinación e o acoso escolar. Marica Campo é a autora dos poemas e Menchu Lamas a responsable das ilustracións.

Arcadia López-Casanova ofrécelle ás lectoras e lectores e Chan da Pólvora unha nova panxoliña, que poderes atopar na sección chanzo. Esta composición únese ás que publicou a finais do 2019 na editora baixo o título A canción da Noite que levas no corazón. O volume, publicado na colección Malaca de fóra cunha coda escrita por Luís Cochón, é unha das achegas máis orixinais de López-Casanova, que nesta plaquette elaboraba unha “crestomatía moi escolleita de cantigas de amor e de amigo, de refrán e mesmo de mestría”, subliñaba Cochón. Agora ofrece Panxoliña da neve de luz, un fermoso texto que conserva íntegro o alento das panxoliñas tradicionais. O poeta, neste sentido, estilizou e actualizou o xenero dunha maneira asombrosa.