Publicado o

O territorio recuperado de Silvia García no novo título da colección ‘Areal de Melide’

Chega ás librarías un novo título de Areal de Melide, a colección na que Chan da Pólvora Editora publica obras de raíces híbridas, intersección de linguaxes e propostas de fusión. Despois de títulos como Ultramarino de Jesús Castro, Sardiña de Miriam Reyes e Ad inferos de Mónica Sánchez, o catálogo amplíase con nenas medrando, onde conflúe o traballo expositivo e os poemas de Silvia García sobre unha colección de fotografías de nenas de distintas épocas. O resultado é un volume escintilante na súa sinxeleza e delicioso nas súas escollas.

O libro, que será o eixo este xoves día 15 de outubro da sesión da Selic de Compostela entre as 19 e as 20 horas, será presentado o día 23 de outubro no Centro Galego de Arte Contemporánea (CGAC), lugar no que precisamente se puxo en marcha o motor de nenas medrando.

O crítico Armando Requeixo publicou o pasado domingo en Nordesía –o suplemento dos xornais do Grupo La Capital, El Ideal Gallego, Diario de Ferrol, Diario de Arousa e Diario de Bergantiños– unha crítica na que salienta a “suxestiva proposta” de Silvia García, “extensión do valioso traballo que esta canguesa leva anos desenvolvendo no eido das artes plásticas, tanto no seu quefacer no CGAC como, actualmente, sendo docente da Facultade de Belas Artes de Pontevedra, mais tamén nas landas da poesía, nas que se dera a coñecer hai tempo como autora distinguida nos certames literarios organizados pola Universidade de Vigo”. 

Neste sentido, Armando Requeixo caracteriza o volume pola presenza do corpo “como territorio radical, a complexidade dos procesos de maduración e as lembranzas das primeiras andainas vitais conforman os vértices nos que asenta a poética indagadora desta obra de Silvia García, que nos desafía a un outro ollar, a descubrir o envés da realidade nas epifanías fotográficas destas nenas medrando.”

Neste link podes descargar en pdf a crítica completa de Armando Requeixo a nenas medrando de Silvia García.

“Un outro ollar”, por Armando Requeixo

Publicado o

‘Álbum da cuarta dimensión’ de Carlos Lema encabeza a Tabela dos libros de Criticalia

O libro Álbum da cuarta dimensión de Carlos Lema, un dos títulos publicados por Chan da Pólvora Editora esta temporada, ocupa o primeiro posto entre as preferencias da crítica na Tabela dos Libros, apartado do blog Criticalia de Armando Requeixo no que participan Francisco Martínez Bouzas, Inma Otero, Mario Regueira, Montse Penas e o propio Requeixo. Álbum da cuarta dimensión está a converterse nun dos grandes éxitos do ano 2020. En medio da desorientación creada pola pandemia, esta obra de máxima esixencia conceptual recibiu unha entusiasta acollida. A última recensión sobre a obra é de Xosé Manuel Eyré no seu Ferradura Blog. Eyré considera que estamos ante un “poemario actual a reflectir unha das problemáticas máis fondas, persistentes e decisivas da poesía, da filosofía e da vida de calquera: a maneira de coñecermos o mundo desde o que ficou del. Un poemario emotivo (non podemos nin debemos ficar “neutros” á vista do que o pasado nos deixou, nin tampouco deixarnos posuír polo espello deformante da melancolía extrema, que ben se nos advertiu) e reflexivo (desde o que nos deixa interpretar a inscrición na materia, nos restos da materia), audaz na forma de presentar esa aliaxe nada sinxela de transmitir aínda que pareza que sempre se fixo así, que esa é a materia da poesía.

Con anterioridade, Armando Requeixo, Ramón Rozas, Roman Raña, Inma Otero ou Mario Regueira publicaron as súas críticas, todas elas cunha valoración excepcional. Se Ramón Rozas subliña que “palabras como as propostas por Carlos Lema son un bálsamo, unha redención dese valor primixenio dende o que recoñercernos e incluso dende o que e explorar novas dimensións do que somos”, Inma Otero escribe: “Este Álbum da cuarta dimensión soa. Non só polo traballo artesanal cos fonemas e os ritmos en cada un dos textos. Toda a obra é unha composición musical en tres movementos, os tres apartados do libro”.

Publicado o

Dendrita, o primeiro libro de poemas de Paula Luís, preséntase este sábado 1 de agosto, as 20:00 horas, no bar Serán de Vigo


Dendrita, o primeiro libro de poemas de Paula Luís, preséntase este sábado un de agosto en Serán. Será a partir das oito da tarde no bar Serán, da rúa Manuel Núñez, moi perto do Museo de Arte Contemporánea de Vigo. No acto, Paula Luís lerá algúns dos poemas de Dendrita, 

publicado por Chan da Pólvora Editora e aclamado pola crítica como un dos títulos revelación da temporada. Non é para menos, a voz da poeta viguesa arrabuña emoicións ata agora insólitas na poesía galega e redescubre latitudes novas sobre a identidade, o xénero e o desexo. Un librto inesquecible dunha poeta poderosa e arrebatadora.
Publicado o

Entusiasta reacción da crítica a ‘Álbum da cuarta dimensión’, de Carlos Lema

Álbum da cuarta dimensión, o novo libro de Carlos Lema, está a converterse nun dos grandes éxitos de crítica deste 2020. En medio da desorientación creada pola pandemia, esta obra de máxima esixencia conceptual recibe unha entusiasta acollida. Armando Requeixo, Ramón Rozas, Roman Raña, Inma Otero ou Mario Regueira son *s autor*s dalgunhas das críticas aparecidas ao longo das últimas semanas, todas elas cunha valoración excepcional. Se Ramón Rozas subliña que “palabras como as propostas por Carlos Lema son un bálsamo, unha redención dese valor primixenio dende o que recoñercernos e incluso dende o que e explorar novas dimensións do que somos”, Inma Otero escribe: “Este Álbum da cuarta dimensión soa. Non só polo traballo artesanal cos fonemas e os ritmos en cada un dos textos. Toda a obra é unha composición musical en tres movementos, os tres apartados do libro.

Continúe lendo Entusiasta reacción da crítica a ‘Álbum da cuarta dimensión’, de Carlos Lema

Publicado o

Mario Regueira adéntrase pola senda da “vizosa efervescencia” da poesía galega

É case un tópico referirse á saúde ducha literatura –asegura o crítico literario e escritor Mario Regueira– pero ao mesmo tempo recoñece no seu artigo sobre a poesía galega publicada no ano 2018 que “a multitude de propostas e as distintas vías de expresión poética inciden novamente na idea dunha vizosa efervescencia, esporeada tamén pola diversidade editorial e comunicativa que a poesía galega forxou nos últimos anos”. O artigo completo de Regueira podedes descargalo desde hoxe en ChanZo, a sección de publicacións dixitais de Chan da Pólvora, dentro da serie que dedicamos a revisar a producción editorial da poesía no período de 2018, “un ano”, engade Regueira, “caracterizado tanto pola persistencia e a diversidade, así como pola ampliación constante de horizontes cara aos que seguir camiñando”.