María Xesús Nogueira antologa a poesía galega de 2018

A partir da publicación descargable da antoloxía (Dous mil) dezaoito, realizada por María Xesús Nogueira, comezamos a proporcionarlle ás lectoras e lectores unha serie de artigos que analizan a produción poética en Galicia no ano 2018.  Chan da Pólvora encargoulle a Nogueira o seguimento dese período, mentres que para o 2019 será Mario Regueira o que o realice. María Xesús Nogueira Pereira (Berres, A Estrada, 1968) é unha das máis recoñecidas investigadoras da poesía galega das últimas décadas, sobre todo no ámbito que indaga na relación entre os procesos da escrita e do xénero. Profesora de Literatura galega na Universidade de Santiago de Compostela, autora de numerosos traballos sobre poesía contemporánea e sinatura frecuente en diferentes medios escritos (durante anos colaborou tamén no desaparecido Diario Cultural da Radio Galega), María Xesús Nogueira foi unha das teóricas da denominada xeración dos 90. É editora de Poesía reunida (1982-2004), de Xela Arias, e colaborou xa con Chan da Pólvora en 13. Antoloxía da poesía galega próxima, coeditada con Papeles Mínimos. Foi presidenta da Asociación Galega da Crítica.

(dous mil) dezoito [María Xesus Nogueira]

 


Miro Villar fai balance poético

A poesía, desde o punto de vista editorial, configúrase como un “sólido reduto de resistencia”, asegura Miro Villar no seu artigo Sete anotacións para unha lectura (persoal) da poesía galega de 2018, que inaugura as edición dixitais de ChanZo. Chan da Pólvora converteuse nese ano, con nove títulos publicados, nun dos proxectos más dinámicos do país. Miro Villar contabiliza máis de trinta selos editoriais diferentes, dos que só catro superaron os cinco títulos publicados.

Sete anotacións para unha lectura (persoal) da poesía galega de 2018 [Miro Villar]

 


Antía Monteagudo esculca a poesía que saíu do papel no 2018

Hai tempo que a poesía está a sufrir un proceso de liberación das súas formas tradicionais e de unión a outros medios artísticos. Os poemas, sublima Antía Monteagudo Alonso na nova publicación de Chanzo, non se escriben só con palabras, senón que existen unha multitude de formas e canles nas que estes poden aparecer. As publicacións galegas de 2018 deron conta desta diversidade e demostraron, a xuízo da investigadora, como cada vez é máis común que o poético dialogue con outras prácticas artísticas como a performance, o cine, a música ou as artes visuais e plásticas.

2018. Prácticas híbridas da poesía galega [Antía Monteagudo Alonso]