Publicado o por

Perto dun cento de persoas visitan a Horta das Chas para celebrar a poesía con Chan da Pólvora

A Horta das Chas acolleu o venres 28 de xuño en Compostela a festa aniversario da editorial Chan da Pólvora. Foron case un cento as persoas que pasaron pola horta no transcurso dos distintos actos organizados, articulados arredor da presentación do poemario Arqueoloxías de amor para a cidade nova, de Francisco Salinas Portugal, e o recital de Breogán Xague, autor de Todos os lonxes, libro co que abriu Chan da Pólvora a actual temporada. Escritor*s, poetas, subscritor*s, artistas ou veciños do barrio de San Pedro en xeral déronse cita na horta para celebrar a poesía, as reivindicacións do colectivo lgtbi+ e para probar tamén o viño de Antonio Pereco, que como cada ano se desabilla para estes festexos. O prato especial que se serviu na ocasión foi unha empanada de rixóns, acelgas e queixo da Ulloa, elaborada polos responsables do selo coa masa da panadería de Carude, en Monforte de Lemos.

Mentres Breogán Xague compaxinou os poemas do seu libro con algúns dos temas do seu segundo traballo discográfico –ademais de poeta ou artista é tamén cantante e compositor de hip-hop–, o deseñador Manuel Martínez e o director de Chan da Pólvora, Antón Lopo, fixeron un pequeno percorrido polos últimos acontecementos da editorial e detivéronse, de maneira especial, no poemario de Salinas Portugal, ao que este ano lle dedicaron o Día do Orgullo Galego coa publicación de Arqueoloxías de amor para a cidade nova, escrito hai máis de corenta anos e inédito ata o rescate que realizou a editora. Salinas Portugal non puido estar na Horta das Chas por cuestións de saúde pero os seus poemas resoaron entre os socalcos do predio e as ábores a través da voz de Martínez e Lopo.

Chan da Pólvora iniciou neste mes de xuño a culminación da súa acción editorial, precisamente cando se vai cumprir unha década desde a fundación do proxecto. Para este ano, anunciaron unha serie de publicacións que completarán, dalgún xeito, o discurso iniciado con Querido Eduardo, presentado tamén un 28 de xuño, data que desde entón se toma como referencia para a pòsta en efuncionamento do selo. Ademais de Martínez e Lopo, Chan da Pólvora fórmana actualmente Iris Cochón e Anxos Sumai na coordinación lingüística, Fran Domínguez na maquetación e Luísa Iglesias na administración.

 

 

Publicado o por

A Horta das Chas acolle o 28 de xuño a festa de aniversario de Chan da Pólvora Editora

Chan da Pólvora celebra o aniversario da súa primeira publicación este 28 de xuño, a partir das 19 horas, na Horta das Chas, o espazo eco-poético da editora. Breogán Xague, autor de Todos os lonxes,  será o encargado de facer o recital de aniversario e, como cada 28 de xuño, tamén se porá á venda un novo libro da colección Rabo de Égua de poesía lgtbio+. Trátase nesta ocasión de Arqueoloxías de amor para a cidade nova, de Francisco Salinas Portugal, ao que Chan da Pólvora lle dedica o Día do Orgullo galego.

Continúe lendo A Horta das Chas acolle o 28 de xuño a festa de aniversario de Chan da Pólvora Editora

Publicado o por

Chan da Pólvora dedícalle á obra de Francisco Salinas Portugal o Día do Orgullo Galego

Francisco Salinas Portugal, integrante dos célebres colectivos Alén e De amor e desamor, escribiu a primeiros dos anos oitenta Arqueoloxías de amor para a cidade nova que, por diversas causas pero sobre todo pola súa temática, quedou agachado nunha gabeta. Corenta anos despois, Chan da Pólvora rescátao na colección Rabo de Égua –a única de poesía lgtbi+ do estado– que amplía o seu catálogo cun auténtico tesouro ao que este ano lle dedicamos o Día do Orgullo Galego. En ateriores edicións, tiveron a súa xornada escritoras e escritores como Federico García Lorca, Serafín Ferro, Sor Juana Inés de la Cruz, Safo, Ramón Suárez Picallo, Antóm Fortes ou Brane Mocetic.

Arqueoloxías de amor para a cidade nova é un libro que penetra na maquinaria do tempo e nos devolve directamente á axitación da chamada “década marabillosa” dos oitenta, cando aínda se sentía a represión do franquismo na carne pero tamén o impulso gozoso de deixar atrás a escuridade. É por eses anos, entre 1981 e 1982, que Francisco Salinas Portugal se traslada a París e comeza a elaborar estes versos de sonoridade voluptuosa, afastados das claves sociais pero claramente enfrontados á orde moral da ditadura.

O pansexualismo, tan vinculado á corrente contracultural que se vivía na época, permítelle ao autor tracexar o debuxo paixonal do corpo, adentrarse na vertixe contraditoria do desexo e describir unha impetuosa pulsión homoerótica. O libro estivo a punto de publicarse en varias ocasións pero sempre acabou arrombado nun estoxo. Corenta anos despois, recuperámolo en Chan da Pólvora como se fose o prodixio dun cofre que garda dentro –intacto mesmo na grafía– un tempo onde medo e pracer conviven na casa.

Francisco Salinas Portugal

Francisco Salinas Portugal (Güín, Bande, 1955) é unha das figuras máis esvaradías da poesía galega dos anos setenta e oitenta. Discípulo de Carvalho Calero e experto nas literaturas de lingua portuguesa, Salinas Portugal publicou os poemarios Os habitantes da culpa (1988) e Boca da Cobra (2012), ademais de múltiples traballos ensaísticos, en especial sobre cuestións literarias da África lusófona, ámbito tamén da súa tese de doutoramento. Durante anos exerceu de profesor na Universidade da Coruña.

Publicado o por

“Todos os lonxes” de Breogán Xague, un dos debuts máis brillantes da poesía galega recente

Estes días chega ás librarías, Todos os lonxes, o debut de Breogán Xague, co que Chan da Pólvora inicia a súa derradeira temporada de acción editorial. O libro, presentado na pasada edición da Selic compostelá por Alba Cid, funciona como unha caste de diario dalguén con 21 anos que marcha ao estranxeiro. A partir dese arrinque, o autor –un artista que transita polos ámbitos da instalación, a museística ou o hip-hop– actualiza o concepto da emigración galega na economía global do século XXI e ofrécenos unha obra escintilante como o fulgor do xeo sobre o que camiña en Suecia. Xague comeza a escribir os poemas cando sabe que marchará a Suecia e coa sensación de que permanecerá alí varios anos. Mentres fala de marchar pero tamén de querer adaptarse, o libro vaise adentrando nos terreo do descoñecido e nós, as lectoras e os lectores, asistimos ao seu devir para entender –e integrar nunha biografía– a nova realidade que o acolle. As súas tentativas, os rodeos e as estratexias tecen unha riquísima superficie de reflexións e estímulos emocionais que converten a lectura de Todos os lonxes nun dos debuts máis brillantes da poesía galega última.
Breogán Xague (Vigo, 1999) é un artista, músico e poeta galego que acaba de graduarse no Mestrado en Arte Libre da Royal Institute of Art de Estocolmo. Vive entre Vigo e Suecia desde o 2020. Neste tempo puido amosar a súa obra en dúas exposición individuais, unha na Galleri Mejan e outra na Galleri ID:I, ademais de varias colectivas no Centro de Arte Mint ou na Real Academia Sueca das Artes, entre outros. Ao mesmo tempo consolidou a práctica artística en Galicia, con recoñecementos como o premio a Novos Talentos Luso-Galaicos da Fundación Eixo Atlántico, o Xaime Illa Couto de poesía ou o terceiro premio Auditorio de Galicia para artistas noveis 2023. No ámbito da música, mantén a súa actividade a través de A Regueifa Plataforma 2.0 e do selo CrystalmineZine. Tamén participou na sexta edición do Festival Internacional Intersección da Coruña e, neste 2024, foi seleccionado para as estancias artísticas CICAGallery da UdC. O seu último disco Xague2 (https://breogan.bandcamp.com/album/xague2) forma con Todos os lonxes unha unidade temporal e biográfica común.
Publicado o por

Tras dez anos, Chan da Pólvora culmina a acción editorial coa subscrición para a temporada 2024/25

Hai case unha década nacía na Illa de Ons o proxecto comunal do que xurdiría Chan da Póvora Editora, un selo que na última década transformou o ámbito da edición poética en Galicia e se converteu nunha referencia do sector. O proxecto global, que ao inicio incluía tamén unha libraría, unha publicación oral ou un espazo artístico, consolidouse só na vertente editora, que agora culmina coa súa derradeira subscrición (temporada 2024/25). Desde o principio da andaina, os responsables de Chan da Pólvora subliñaron que non pretendían perpetuarse no tempo senón desenvolver unha acción editorial reivindicativa do valor da poesía no país, tanto desde o punto de vista creativo e cultural como desde o social ou o económico. Para celebrar esta derradeira temporada, o selo prepara unha serie de sorprendentes lanzamentos, o primeiro dos cales é Todos os lonxes do artista e músico de hip-hop Breogán Xague, que chega agora ás librarías. Francisco Salinas Portugal, Emma Couceiro, José González, Euxenio Montes ou Margarita Ledo son algúns dos nomes que, nas próximas semanas, sairán do prelo para completar o discurso tracexado pola editora nos últimos anos.

Continúe lendo Tras dez anos, Chan da Pólvora culmina a acción editorial coa subscrición para a temporada 2024/25

Publicado o por

Cáccamo leva ‘A liña da vida’ á libraría Couceiro de Compostela coa compaña de Baldo Ramos

A liña da vida, o libro que marca o regreso de Xosé María Álvarez Cáccamo á “poesía para adultos” –como el subliña–, preséntase o vindeiro xoves día 30 de maio en Compostela. Será a partir das sete da tarde na libraría Couceiro e na compaña de Baldo Ramos, artista co que Cáccamo colabora desde hai anos en múltiples proxectos interdisciplinares. Hai xa sete anos que Cáccamo non publicaba un poemario en liña coa súa xa longa travesía poética, malia ofrecernos nese tempo libros de poemas para crianzas –Tinta de luz, precisamente en Chan da Pólvora con pinturas de Berta Cáccamo–, libros de artisa, poemas obxectuais, novelas ou ensaios. Os textos que compoñen A liña da vida pronuncian unha nova voz do, a expresión dunha tonalidade clara que recolle as vivencias do corpo en tempo de inverno, as da idade próxima aos arrabaldos da vellez, condición asumida desde a “austera disciplina da melancolía” pero aínda instalada na emoción do asombro e da expectativa.