‘A desvértebra’ de Ana Romaní entra no CGAC da man da artista australiana Narelle Jubelin

A desvértebra, o libro de Ana Romaní que publicou Chan da Pólvora e agora acaba de ser reeditado na colección Sentulo, entra no Centro Galego de Arte Contemporánea (CGAC) da man de Narelle Jubelin, artista australiana (Sidney, 1960) que inaugura este venres a súa mostra Nalgures.  A exposición, segundo subliña a súa curadora, Natalia Porcela, “sitúanos nunha indeterminación que está por definir, no interior dunhas xeografías fragmentarias: lugares, vestixios, modos de ocupación”.

Jubelin chegou aos versos de A desvértebra despois de analizar unha serie de contextos vinculados á cultura galega. Dalgún xeito, na palabra de Ana Romaní (e na figura de Begoña Caamaño glosada en A desvértebra) atopou unha forte conexión e decidiu facer unha intervención caligráfica na cristaleira do CGAC a partir do poemario (momento que recolle a fotografía deste artigo). Cada pano da enorme cristaleira é entendida por Jubelín como unha páxina.

Continúe lendo ‘A desvértebra’ de Ana Romaní entra no CGAC da man da artista australiana Narelle Jubelin

Catro autor*s de grande impacto para ‘Sentulo’, a colección de libros de man de Chan da Pólvora

Chan da Pólvora  enfróntase á inflación e ao encarecemento do papel cunha aposta radical: o relanzamento da súa colección de libros de man Sentulo. Estes días, precisamente, chegan ás librarías os catro títulos que definen a aposta, caracterizada pola selección de textos –algúns deles inéditos–, o prezo excepcional de doce euros e o coidado material que fai tamén dos volumes da editora un obxecto de disfrute táctil e visual. O catálogo inclúe títulos como Simún de Nuria Vil –un dos acontecementos poéticos dos últimos meses–, A desvértebra de Ana Romaní –aclamada tanto pola crítica como polo público– ou O gran poema, poderosa epopea coa que Constantino Bértolo recuperou o galego para a súa obra. Canda eles, descubriremos Neve de agosto, o primeiro libro de Nieves Neira Roca, chamado a ser un dos títulos favoritos da afección neste verán.

Silvia García presenta este sábado na libraría Wells de Cangas o seu libro ‘nenas medrando’

Silvia García regresa este sábado día 28 de maio a Cangas para presentar nenas medrando, o libro que Chan da Pólvora publicou na súa colección Areal de Melide, dedicada a proxectos poéticos de materiais híbridos. O acto, que  contará coa presenza de Xaime Toxo —escritor e presidente do Ateneo de Pontevedra—.terá lugar a partir das doce do mediodía na emblemática libraría Wells de Cangas, a vila na que a autora naceu en 1973. nenas medrando xurde dunha colección de fotos de nenas de distintas épocas que a autora foi recollendo durante narios anos. O resultado é un volume escintilante e delicioso.

En 2009, Silvia García iniciou na Biblioteca do CGAC o proxecto Os silencios de Alicia. Unha década despois retoma algúns dos elementos deste proxecto e redimensiónaos cunha serie de poemas onde a súa voz se funde coa memoria allea para construír un libro arredor da conciencia do corpo, das sensacións, dos procesos de maduración e, mesmo, dos recordos que aparecen cando asistimos como nais ao crecemento dunha nena. Silvia García comezou a coleccionar fotografías anónimas adquiridas en mercadiños e a través de internet

Sobre esa base, intentou buscar un fío que lle permitise albiscar a pose e a maneira na que as mulleres e as nenas aparecen nas fotografías: como miraban a cámara e como traslucían se estaban cómodas ou non. Aí comezou a súa curiosidade polo silencio, polo que cada nena cala, a súa incomodidade pero tamén o seu acomodo a unha realidade que lle ven dada.

O crítico Armando Requeixo caracteriza o volume pola presenza do corpo “como territorio radical, a complexidade dos procesos de maduración e as lembranzas das primeiras andainas vitais conforman os vértices nos que asenta a poética indagadora desta obra de Silvia García, que nos desafía a un outro ollar, a descubrir o envés da realidade nas epifanías fotográficas destas nenas medrando”.

Inma López Silva adéntrase con ‘Clepsidras’ nos misteriosos lazos que nos unen

Clepsidras é o título do primeiro poemario de Inma López Silva, unha escritora que desenvolveu unha brillante carreira como narradora e que agora se adentra, por vez primeira, na poesía. Trátase dun libro apaixonante, tanto pola súa escrita como pola ousadía literaria da autora, que experimeta coa voz e cos recordos. Clepsidras, último Premio Eusebio Lorenzo Baleiron, preséntase este martes 17, Día das Letras Galegas, en Dodro, nun acto que terá lugar no CPI Lorenzo Baleirón ás 17,30 coa participación de Su Garrido.

Continúe lendo Inma López Silva adéntrase con ‘Clepsidras’ nos misteriosos lazos que nos unen

Ábrese ao longo deste mes a campaña 2022-23 de subscripción á editorial

Chan da Pólvora Editora abre un novo período de subscrición. Durante este mes de maio, todas as persoas que forman parte do proxecto e queren renovar o seu apoio, así como as que desexan incorporarse, poden facelo a través de dúas formulas:

• Unha transferencia de 130€ á conta ES39 3070 0035 2261 6868 3529

• Na web a través da lapela de “Subscrición”.

Existe, ademais, unha modalidade para personas sen traballo que ten un custo simplificado de 75 euros. A subscrición, realizada baixo a modalidade de de preprodución, permite recibir na casa os libros da editorial a un prezo regularizado de dez euros, ademais de ter avantaxes na compra doutros títulos editados con carácter de coedición.
Ante as dificultades dos últimos meses co papel (encarecemento brutal e escasez material), Chan da Pólvora ten previsto relanzar unha colección que permita manter o contacto da poesía coa afección sen que iso supoña un aumento significativo do gasto. Porque Chan da Pólvora é a poesía necesaria.