Oriana Méndez, unha das autoras xa clave na nova poesía galega, refunda a súa singular proposta de linguaxe e de forma con chairas sucesións, o libro que acaba de publicar Chan da Pólvora e que estes días chega ás librarías. En palabras de María do Cebreiro, autora do posfacio do volume, estamos ante “un libro sobre o amor e sobre as escuridades do amor, que son a condición de posibilidade dos seus propios recomezos”. 

chaira sucesión é a máis ambiciosa das entregas poéticas de Oriana Méndez, unha poeta que nos últimos anos transita os lindes máis afiados da poesía. Desde a publicación de Interna, o libro previo a chaira sucesión, a poeta optou por desviar o punto de vista dende o plural cara ao individual, do nós ao eu, do fenómeno externo ao que acontece por dentro. Tamén hai un tránsito dende a escrita do maiúsculo –o histórico, o colectivo, o común– cara ao minúsculo: aquilo que só dous comparten. Estamos ante unha historia de dous que se amplifica no pensamento poético de quen escribe e o libro é o acontecemento que supón descubrirse, de súpeto, en relación ao outro e ao propio acto poético. O acontecemento exteriorízase dalgunha maneira na escrita do mesmo xeito que sucede cando un sentimento, favorable ou doloroso, se transforma en cerimonia. A chaira, é dicir, o encontro, adquire unha forma propia e exenta, acrisolada tamén, que é a deste libro obsesionado co plano poético das cousas.

Continúe lendo Oriana Méndez e o fondo desexo da verdade no seu último libro, ‘chairas sucesións’

Louise Glück, a poeta que se converteu, con tres títulos no catálogo de Chan da Pólvora, nuha das referencia da editorial, faleceu  o pasado venres día trece aos oitenta anos. Esta mesma semana, Chan da Pólvora comezou a distribución do terceiro título que publica da autora, titulado precisamente Averno, un intenso conxunto de poemas traducido por Samuel Solleiro que se adentra nas vertentes da alma e da morte. En Chan da Pólvora, sentimos de maneira especial a súa desaparición, non só polo compromiso que fixeramos coa súa obra senón tamén pola admiración que lle rendiamos a unha poesía que, dalgunha maneira, cambiou a nosa forma de entender a creación literaria nas últimas décadas. En Chan da Pólvora tamén se poden atopar os seus derradeiros poemarios, Noite fiel e virtuosa ou Receitas de inverno desde a comunidade.

A alma e o corpo son os dous elementos que transitan en unión e en diáspora por Averno, un dos libros máis aclamados de Louise Glück. Trátase do terceiro volume desta Premio Nobel de Literatura de 2020 que publica Chan da Pólvora, dentro dun proxecto para ofrecerlle aos afeccionados galegos unha panorámica da súa obra. Glück é unha poeta sempre inquietante e Averno define perfectamente o seu estilo, centrado sempre en responder as grandes cuestións da alma. A súa escrita reconfórtanos con poemas que botan man de revelacións planificadas para lembrarnos o que de verdade paga a pena en nós. Tamén o que nos permite, desde o seu punto de vista, entender os riscos humanos que nos habitan. A escritura convértese, así, no seu camiño e na súa busca. De aí ese equilibrio perfecto entre o lírico e o intelectual que podemos descubrir en Averno. Na poesía de Glück non serven as excusas, pero tampouco falta nunca a compaixón.

Continúe lendo O adeus a Louise Glück, a voz da muller que iluminou unha nova dimensión na poesía

 

Chan da Pólvora Editora renova o seu compromiso coa Feira do Libro de Monforte, última cita do calendario libreiro do verán, onde presentará entre o 23 e o 26 de agosto as súas máis recentes novidades: Libre de libro de O Leo, As cunchas baleiras de Branca Novoneyra, Seis poemas de inferno e adolescencia de Rimbaud e Lupercais, antoloxia que recolle os poemas do colectivo de poetas vinculados ao festival celebrado en Lugo.

Continúe lendo Chan da Pólvora Editora renova este agosto o seu compromiso coa Feira do Libro de Monforte

O 28 de xuño de 2016, nacía Chan Pólvora Editora e facíao precisamente con Rabo de Egua, a única colección do estado español especializada en poesía dos colectivcos LGTBI+.  Agora, despois de sete anos, a colección preséntase por vez primeira desde unha perspectiva de conxunto cun acto no que participan Antón Lopo e Luís López Alonso. Será o sábado 19 de agosto no Beque de Moaña, dentro do programa dos Versos para a diversidade, que organiza o Colectivo Diverso do Morrazo.

Continúe lendo A colección Rabo de Egua achégase este sábado 19 de agosto aos Versos da Diversidade en Moaña

Catro dos poetas lupercais –Nieves Neira, Maria Grandío, Xerardo Quintiá e Luís López Alonso– presentan este mércores nove de agosto na libraría Wells de Cangas, a partir das nove do serán, a antoloxía de Chan da Pólvora sobre este colectivo, titulada precisamente Lupercais (Unha antoloxía posible). Aínda que engastado na súa xeografía a Lugo,  o grupo mantén relacións con distintas latitudes do país, incluído o Morrazo, onde reside López Alonso, autor dunha das xoias da poesía última galega, Salífero. O autor (Sarria, 1977) desenvolve unha proposta onde a dimensión do verso se mestura coa experimentación física e emocional, o cal o converte nun dos performers poéticos máis interesantes do momento actual en Galicia. Canda el estará unha poeta estreitamente ligada a Chan da Pólvora, Nieves Neira, autora dun dos títulos máis celebrados dos últimos anos, Neve de agosto, con tres edicións nas librarías e un feixe de críticas excepcionais. Neve de agosto aborda a cuestión de esperar o inesperado e non caer na negación do mundo, de asumir a desilusión do horizonte e non negar a emoción e o movemento.

O recital da libraría Wells de Cangas inclúe a poesía de María Grandío e Xerardo Quintiá. Ela é dona dunha presenza poderosa que atopa no verso estremecedor o impacto da poesía (case dramática por momentos) mentres Quintiá explora vieiros no que conflúen a poesía, a literatura dirixida ás crianzas ou a novela, como a súa extraordinaria achega á peripecia de Manfred Gnädinger, o Alemán de Camelle.

Ademais destes nomes, Lupercais (Unha antoloxía posible) inclúe a obra doutros membros do colectivo, como Genaro da Silva, Sara Plaza, Abrahán Pérez, Antóm Fortes, Mónica Caldeiro, Luís Valle, Lois Pérez e Miguel Ángel Curiel, que nesta antoloxía de Chan da Polvora publica os seus primeiros poemas en galego. Son doce poetas nunha relación profundamente literaria, case bohemia, e que consolidaron a súa amizade arredor das Lupercais, nome dun festival organizado polo colectivo que cada ano se celebra en Lugo.